​اللي يظن إن الأمن والأمان بيجوا بالراحة ومن غير ثمن، يكون قاري المشهد بالمشقلب. الكلمة الكبيرة والجريئة اللي طلعت من المسؤول وقال فيها بكل صراحة: «بدون تضحيات ما في أمن وآمان.. وكل شرطي هو مشروع شهيد في هذا الوطن»، هي عين الحقيقة اللي لازم تنقال بصوت عالي ومن غير أي مساحيق تجميل.

​طلع علينا بعض الناقدين يدققوا على الكلمات، ويقولوا إن هذا الكلام فيه استهانة بحياة رجال الأمن! والرد عليهم بسيط وواضح: اللي بيلبس هالهندام العسكري وبيوقف بالشارع في عز البرد والحر، عارفين ومدركين قبل غيرهم إنه حامل روحه على كفه. 

عبارة «مشروع شهيد» مش تقليل من قيمتهم، بل هي أعظم وسام شرف وعقيدة رجولة وفداء بيتحلى بيها كل نشمي ونشمية في أجهزتنا الأمنية. هاذول الزلم ما بيوقفوا بالواجهة عشان يستعرضوا، بيوقفوا عشان المواطن ينام بين أهله وآمن على حاله وعرضه وماله.

​واللي بيحكي إن الأمن بييجي بس بالتخطيط والورق، بنقوله: التخطيط على العين والراس ومهم، بس التخطيط بدون زلم شجعان بيبصموا بدمهم في الميدان ما بيسوى إشي وقت الجد. 

أعتى الدول وأحدثها تقنية بحاجة لرجل أمني عنده انضباط وشجاعة يثبت في لحظة الخطر لما غيره يهرب. الأمن سلعة غالية، وثمنها مش مصاري، ثمنها سهر وتعب ودموع أمهات وتضحيات كبيرة.

​كل التحية والإجلال للهامة الوطنية والمؤثرة اللي نطقت بهاد الكلام؛ مسؤول صادق وشجاع ما تخبى ورا مصطلحات مائعة، ولا جامل على حساب الواقع. وضع النقاط على الحروف بشفافية رجل الدولة الواثق من حاله ومن نشاماه. هاد النوع من القيادات هو اللي بيبني المعنويات وبيعطي رجال الأمن حقهم وقدرهم، ويوصل رسالة لكل الدنيا إن الأردن حصن منيع بأهله وزلمه الشرفاء.

​بدنا نلتم حول جند الوطن ورجاله، ونعرف إن النعمة اللي إحنا فيها وراها عيون ما بتنام وأرواح رخيصة في سبيل البلد والهاشميين.

​حفظ الله الأردن والهاشميين.