القبة نيوز- صحيت من الصبح بكير لأنو اليوم دوري بالمراقبة والاستطلاع وقبل ما غسلت وجهي وبسرعه فائقه فتحت برادي الغرفة وبنظرة خاطفة عند حاويات القمامة اعزكم الله شفتهم أربع كلاب واحد منهم حسيته بعرفني لأنو ضل يطلع فيني وكأنو بتحداني...هو صحيح أنا ما بقدر اطخو أو اضربه أو حتى ازعله ولو بنظره...بس كمان أنا مش سهل بلشت أحكي معو واترجاه يا كلبنا الوفي يا قمر يا صاحبي يا حبيبي بحياة امك اتركنا نروح على الدوام بعطيك إلي بدك اياه بعطيك لحمه أو جاجه المشكلة أنو ملعون الوالدين كأنو فاهم أنو محمي من الحكومة ومن الهيئات والمؤسسات الدولية حسيتو بضحك علي...بس برضو متل ما حكيت أنا كمان مش سهل...اطلعت فيه بخباثه مع ضحكه ماكرة خاطفة مني وبستهزاء وصوت كله ثقه ورجولة حكيتلو خليك واقف يا سيدي مش رايحين ع الشغل ولا ع المدارس...